經文：以賽亞書55:10-13；馬太福音13:1-9, 18-23

賴弘專

兄弟姊妹大家平安！

今年春天，我與靜欣搬厝、徙到另外一棟公寓，佇阮的公寓的邊仔，抵好有一塊地，有一個厝邊給阮講：「lín 會通來種物件哦！」所以阮就興起種菜的念頭，想講若會通種成功，不nā會通吃到有機、organic的菜蔬，koh會通當做一種真好的運動。就按呢，兩個人決定種高麗菜，歡歡喜喜去買人發好勢的菜栽來種。因為攏無經驗，所以干單種四叢試看麥teh，照說明書的指示，先將壞草挽掉，一叢kap一叢的中間làng pāng，kah種落土裡，逐天沃水聽候轉大叢的時準。差不多兩禮拜以後，有兩叢的葉仔大的真緊，總是另外兩叢倚壁的發kah卡慢，我就kah靜欣講：「大概倚壁的土質無好、下底koh有石頭。」總是koh過兩禮拜，奇怪，原底倚壁的那兩叢，葉仔漸漸大，koh生肉，反轉外kháu的那兩叢，按怎沃攏無法度繼續大叢。為著解決這個問題，我用shovel將in邊仔的土挖開，結果愈挖愈pháiⁿ挖，才發見in的下底是硬khok-khok的石頭，根本無法度鬆土。按呢我才了解，倚壁的那兩叢一開始會發卡慢，是因為菜栽生根需要時間，總是當根kap土結合，就會吸收土裡的營養，開始直直大叢起來。土的品質影響種子的生長這呢大，若是將天國的好消息看做種子，按呢需要什麼款的環境，才會互伊生湠、結實多多？耶穌撒種的譬喻，相信大家攏真熟，總是看起來愈簡單的經文，內底的道理往往愈深、愈豐富。耶穌用大自然萬物成長的道理來表達上帝國，相信其中有互咱真大的挑戰，希望大家對今仔日的經文，koh一擺來chhiâu-chhoē天國的種子生長的秘密。

代先，咱先看以賽亞書第五十五章第10節至13節，這是以賽亞先知對受擄佇巴比倫的猶太同胞所傳講的信息，佇今仔日普世教會共同使用的經課表內面，與馬太福音第十三章排做伙。這兩段經文，關聯不只á深，攏用種子來代表上帝的話。總是舊約的經文，更加注重上帝的話的本質，伊講上帝的話一旦對上帝的嘴講出，絕對無空空倒轉來，是欲成就上帝所定著的、所歡喜的代誌。這款的確信，佇今仔日來聽，也互人心存敬畏。咱今仔日kám猶原相信，上帝的話有絕對的效力，一發出，就親像雨與雪，為著土地帶來生命的氣力，造成改變？我想，不nā今仔日，早時的猶太人也曾對上帝失望，對上帝的話與應允感覺搖疑。這群住佇巴比倫的猶太人，in佇做奴僕、離開故鄉四十餘年的中間，一定也bat問上帝：「上帝啊，你的拯救什麼時準才會臨到？」聽候是非常困難的功課，特別是當現實與所盼望的違背的時。總是當上帝的時機到，猶太人受擄了後五十年，上帝就興起古列王，透過伊允准猶太人轉去自己的祖家，成就伊當初透過先知耶利米所做的應允。先知講上帝的話「決斷無空空倒轉來」，是要咱看見佇世間的紛紛擾擾、人事的變遷中間，上帝欲成的事猶原teh進行，互人反悔、歸向上帝。咱kám有信心的目周去看見？

上帝的話的大氣力，佇耶穌的教示中間，也是非常重要的主題，不過耶穌進一步，將上帝的話與天國的福音結連起來：耶穌講的話帶來一個新的國度，若是相信伊的話的人，就會通進入一個屬佇天的國度。佇馬太福音芥菜籽的譬喻內面，耶穌已經講起這個天國爆炸性的氣力，總是佇撒種的譬喻內面，耶穌要咱注意的，是人的心對天國福音的反應。種子落佇四種不同款的土地，有不同款的命運。總是第一個心熟的所在，是種子不nā撒佇好土地，也是四界撒，什麼款的土地攏撒，這實在無符合一般世間人的道理與logic！這個撒種的，講好聽是好額、若像teh撒好玩；講歹聽的，實在真gōng、真打玩，伊kám不知中間有loā多會變作無效？總是這就是天國的道理kap世間的道理無同款的所在，天國的福音是互世間所有的人，不因為人的心的不同，來有所分別。佇這也互咱思考天父上帝對世間人的心意，伊無論按怎就是欲互世間人機會；若是將撒種的，解釋作耶穌，抑是接受耶穌吩咐的你與我，也同款，就是欲將天國的好消息報揚出去。不是因為這個人特別受教才傳，也不是因為人的愚頑就一句話攏無講。天國的種子，人人攏有機會承受、去做回應。

總是，尚介決定性的因素是，領受天國的種子了後，要去寶惜伊，互伊莆芽、成長，這是耶穌這個譬喻尚介強調的一點。人的心若是無認真思考天國的道理，按呢道理講kah loā深入，也無碌用；咱的心需要備辦所在，互上帝的話來釘根、發íⁿ，按呢生命才有可能互上帝的話來填滿，來得到改變。耶穌講起天國的種子發boē好勢的幾種情形，其實佇現代人的生活中間攏看得到。第一項是種子ka-la̍uh佇路邊，佇現代的社會，逐人一日接收太多的網路的information，若是將耶穌的道理當做無意義的information，這就親像接受道理了後無曉悟，飛鳥馬上來kah吃了了。第二項，種子無法度佇石磯地釘根，若無根，種子絕對boē大叢，抵到風吹，馬上就倒；有時，咱將生活剖作真多部分，干單禮拜日互耶穌，總是其他的部份，追求其它的神明，譬如金錢、成就、享受，無容允耶穌佇其它的部份也來做王，這會造成天國的種子無法度佇生命尚深的所在釘根。第三項是種子落佇生刺á的土地，就親像錢財的迷惑、世間的掛慮，其實耶穌不是要咱攏免kut力做工、賺錢來照顧家庭，總是當錢財互咱無法度對上帝國致意的時，種子就無法度來長大。最後，耶穌講起撒佇好土地，就親像「人聽道理來曉悟，伊實在結實」。「曉悟」這個字是重點，什麼叫做曉悟？是經過一個深入思考的過程，最後把握到其中的意義，互道理進入生命、成作活命的氣力。這就親像福音進入充滿養份的土地，最後種子與土完全結合。講到「曉悟」，我就想到一些對台灣抑是中國來到北美的留學生，in參加教會舉辦的查經班，一開始會提出chiok多問題，互人認為in是來找麻煩；總是其中的一部分，因為認真的追求、koh得到真好的引導，最後成作耶穌基督的跟隨者。講實在的，有時教會佇幫贊慕道友「曉悟」的過程，需要付出真多，不過這就是改變人去除信仰道路頂面的窒礙。親像掘土的過程真辛苦，要khoaⁿ-khoaⁿ-á將石頭撿起來、壞草挽掉，除去生長的窒礙，甚至施肥，互土地會通適合種作。我想，這也是教會佇幫贊上帝國的福音發展的時，尚有意義的一種付出。

最後，kap大家分享這五年來，我與靜欣投入EQ Camp服事的心得。會記得頭一年阮tng開始，攏無什麼教會夏季學校的經驗，面對十通ê社區的gín-á，阮佇台頂放詩歌互in唱，教聖經的故事，台仔下亂糟糟，講話的講話，chông來chông去的chông來chông去，根本無teh隨，那時我心內想：「我連喊攏喊未贏阿，講聖經的故事kám有人會記得心內？」總是經過這幾年來，教會無放棄對這個社區的使命，阮也繼續講聖經故事、帶小朋友唱聖詩、教手藝，咱的忠心的同工，也繼續教乒乓、煮中午頓互gín-á吃、看頭看尾。前一陣聽到EQ Camp的家長講，伊的大漢kiáⁿ已經受洗禮阿；這次的EQ Camp，看到過去兩年攏有來的一對兄妹仔，不只更卡識代誌、gâu照顧別人，koh乒乓也打kah夏夏叫；koh有過去情緒管理不好勢、真快生氣的小朋友，今年卡愛笑、會與人逗陣。這攏是過去所想未到的，也互人看到福音的大氣力，是佇人無注意的時，就佇人的心內漸漸釘根、發íⁿ、甚至結實。阮感謝教會，互阮有機會參與佇這個有意義的事工，因為所做的不只是撒種，也是將小子接受福音的窒礙來去除，互in的心會通成作接受天國種子的好土地；阮也感謝作伙打拼的同工，因為lín的忠心，小朋友有得到身體的飽足，也得到體格、靈性全人的發展。佇未來，相信天國的種子會佇這些小子的心內繼續長大，佇牧師kap長執的帶領下面，EQ Camp kap咱的兒童事工會有新的一頁！求主幫贊咱不通失去盼望，因為咱的氣力會消無，總是「上帝的嘴所講出的話─決斷無空空倒轉來，是欲成上帝所歡喜的。」

祈禱：

慈悲憐憫的上帝，感謝你用撒種的譬喻教示阮天國佇人的心成長的道理。 阮承認阮的軟弱，時常無用心領受天國的好消息，幫贊阮佇心內備辦所在，互耶穌的真理佇阮的心內釘根、成長、莆芽。 阮懇求你照祢的信實來幫贊教會，互阮參與佇祢撒種的工程，為著去除人心內接受福音的窒礙來著磨。 最後，阮為著教會新的一代來祈禱，阮真盼望教會有小子佇這來成長、投入，求祢自己備辦好土地，互這個所在koh一遍成作有gín-á teh嘔咾祢的名的所在。 按呢祈禱，是奉主耶穌基督的聖尊名。 祝禱： 願耶穌基督的恩典，天父上帝的疼痛，kap聖神的感動交通，kap lin眾人相偕在的，對這時到永世代無盡，阿們！